لاضاق صدرك خذ السجات لك طاري

لـ عبيد القلادي، ، في الحكمه والنصح، آخر تحديث

لاضاق صدرك خذ السجات لك طاري - عبيد القلادي

لاضاق صدرك خذ السجات لك طاري
سج القدم زيد جسمك وشحنه طاقه

سيّر على اللي اليامن شافك اجباري
ينطحك من فرحته تضحك لك اعماقه

مفتوح بابه وهو للمرجله شاري
ونفسه خفيفه لفعل الطيب عشاقه

وجنب عن اللي ماهو للمرجله ضاري
لاشاف وجه المسيّر ضاقت اخلاقه

مكان بيته محد عن موقعه داري
دائم يشيك على بابه بمغلاقه

ماطب مجلسه لا مسير ولا الجاري
عش العناكب على البيبان والطاقه

وإلا مع البر لا من ذعذع الذاري
ياحلو خضر الشّجر توميبه أوراقه

الأرض خضراء بشكل اللوانها تماري
ولون اليّهق والنفل يرسم لنا باقه

البر اعشقه واحبه وعشق ادياري
والنفس دائم لحب البر تواقه

واحب بيت الشعر في وقت الأمطاري
نسمع الصوت الرعد ونشوف براقه

ودلال كيفن مراكيها على الناري
وأسمع دنين النجر والنفس مشتاقه

(والواكف) اللي يصب من المطر جاري
(اناييه) بين وجار النار ورواقه

وسحبن تقافى طوال الليل سماري
من غيبة الشمس لين الصبح وشراقه

والسيل بالأرض يجري مثل الأنهاري
والعشب فيه الغنم تشبع مع الناقه

وتشوف بالارض كشاتي وصقاري
والنفس دائم لحب الصيد عشاقه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر