درس الزمن

لـ يوسف السناح، ، في غير مصنف

درس الزمن - يوسف السناح

للفعل دور وللتباهي مضاهاه
يلي تجاوب كل صيحه بصيحه

عند السعه كلن تبا اطول شلفاه
حتى ترى المترديه والنطيحه

وراع الشدايد بالمواقيف نلقاه
لاغاب من يفضح ضلاله فحيحه

في يوم يلقا الرجل من ربعه اعداه
ويلقا من اللي يرفعه عن مطيحه

ودرس الزمن شفنا وعفنا عطاياه
لاهو كريم ولايدينه شحيحه

واللي قرى حرفه عرف وين معناه
وميز غنايم كل خطوه صحيحه

ولايحسبنا من سرى الليل بعواه
مثله مغير انهز راس القريحه

نقدر نسد عيون ونسكر افواه
وكل ضلع راسي عن مكانه نزيحه

وبين امتداد الطيب والعرف والجاه
من التحارب نستشف النصيحه

نقبل على نوماسنا اللي ورثناه
على خطى قوم الفعول الصريحه

وسلاحنا من قبل لايثور بخباه
نبعد مدام فجوج ربي فسيحه

صدة ظفر تاخذ من العز مبداه
ولا واقعه تحسب علينا فضيحه

© 2024 - موقع الشعر