نسايم ليل

يا شعرنا الموروث طالبك السماح
عني وعن شعّار جيلي كلّها

ماني وكيل الورث وأفلح يا فلاح
لا شك قسمي ف الرعيّه جلّها

حنّا عيال العولمه والإنفتاح
وأنته علومك خلّها في حلّها

الفلك داير من صباح إليا صباح
حلّت عليك اللي تبا تحتلّها

ماهوب لازم نآآرد العد القراح
كثرت مواردنا ولا تفطن لهاا

العام في ظل الشجر والورق ناح
واليوم تكفينا القصور وظلّها

تصبح ونضرب بك على الحزم البراح
وتمسي خلاوي والدموع تهلّها

مير أقتنع بالحال واللي راح راح
ريّح ضميرك والحواجب فلّها

يا ملقّحين الحيل .. ولدنّ اللقاح
تقاسموها .. لا تموت بغلّها

هبّت نسايم ليل من مبسم نجاح
ياليل بلغّها السلام وقلّها

(جمهور الأستديو ) على خفّ وجناح
وإليا تثنّى عودها طبلّها

والناقد المنقود ساق الإقتراح
وضيوفها نضحك لها ونملّها

رزّت علمها باشة الغيد الملاح
أصبر عليها والسيوف تسلّها

المجتهد عيّا يحالفه النجاح
أظن ساس المشكله في حلّها

المصلح الله كان تبغون الصلاح
والله يخلي ل الخليله خلّها

اقرب مثل يلبق على مبسم نجاح
اللي عقد روس الحبال يحلّها