لا تضايق

لا تضايق كلّي لعينك صباحات و أغاني
جعل كل الضيقه اللي بك تخليك و تجيني

ضيقتي و إعتدتها وش عاد لو هي جات ثاني
عنك أبيها .. عنك أعانيها .. و عنّك تبتليني

خلّها ترتع بخافقي و تستعمر كياني
خلها تستفرد بعمري و تسبي من سنيني

خلها هالضيقه اللي بعثر اخطاها زماني
يوم يعطيني غلاك الحلم و يقول : إحسبيني

ضايق الضيقه و نشّف ريقها و أطلق عناني
يوم يزرع في يديك العشق .. يوم أجني يقيني

بس تكفا .. كفكف دموع الحروف وقل ( عشاني )
خلّ متضايق تروح لحالها قول : إسمعيني

كل مابي يسمعك .. ياللي لك العمر إصطفاني
إيه ما غيري لعينك و أنت ما غيرك لعيني

قولها و بكل غرور : أنا القديم اللي عطاني
أمسي أجمل باكري والشمس معسوفه بيميني

قولها : أنا الجديد و هي زماني مع مكاني
يوم سوّرني غلاها بي بدت و بتنتهيني

خلّ عنك الضيق يا كل العمر ، كل الأماني
أنت بس إضحك تلاقي ضلوعك غيمتيني

و إن ذكرت إني شكيت ما نيب أعاني
بس ما أرضاه لخفوق اللي أبيه وهو يبيني

ودي أن طاري الزعل و الضيق يمك ما يداني
ودي إني فيك أضيع و فيك أعود و ألتقيني

إنت بس إنثر شعورك .. قل عطورك بالثواني
شوف كيف تسولف النسمات حتى تمتليني

شوف وشلون الثواني تصبح ضيوف و تهاني
شوف كيف الوقت يورق بين همساتك و بيني

السنين.. ان طولت .. تكبر بها خضر المعاني
و حتريتك أكثر .. الين الكون يزهر من حنيني

ايه يا أروع خفوق خفقته لي المواني
إيه يا أغلا غلا نسى خفوقي غالييني

خل عنك الضيق .. لا تطريه .. خل الغصن داني
و إقطف لسمعي سواليفك .. و (( كبّرني بعيني ))