عض الشفايف

طالت مسافاتي / و عفت المشاوير
و الهم لجلج .. بالظلوع النحايف

و الوقت عاندني / و شفت المدابير
حدتني .. لدرب الشقا و الحسايف

يضيق بي ثوبي / و أفك الازارير
و أرقا / من الضيقة بروس النوايف

و احسب / تكاليف السهر و التفاكير
و اتبع .. سراب الحلم و الحلم زايف

و امشي .. و تحداني الهبوب المعاصير
يم .. الدروب الموحشات النكايف

و اتصّنع الضحكة .. و يجرحني الغير
و اصبر /على الفرقا و فقد الولايف

ناظرت / بالدنيا و شفت المخاسير
من دونها تقصر .. جميع الوصايف

ما كني الا .. بين كابل و كشمير
بلشان .. بحروب العجم و الطوايف

حلمي مواطن / ما انصفته المقادير
رغم الشهادة / ما اقبلته الوظايف

و حزني مُمثل / و المصايب جماهير
و القلب مسرح / للسنين العجايف

و يا طير يا اللي / جيتني حزة عصير
من علمك .. عشق الغصون الخفايف

من علم الشباك /حكي العصافير
من علم الضيقات / عض الشفايف

من غيّر الحاضر/ و جاب الاساطير
من كبر بشوف الدموع الذرايف

من بدد الضحكة / و ساق المعاذير
من بعثر .. ضلوع القلوب النظايف

ليش / الليال المدبرة ما بها خير
و القلب / من جور المقابيل خايف

يا طير قلي .. بأخر الهرج يا طير
ليش الحزن .. سوَّد بياض الصحايف