أنا هواي ورغبتي جيب فكسار
من وارد الدوحة والأرقام تصدير
هو منوتي لا جات الاسفار
وهو منوة اللي يقطعون المشاوير
لازان جو البر من عقب الامطار
والقاع جاها من الحيا وافر الخير
العشب فيها بين ربلة وصفار
وريح الخزاما عطر الجو تعطير
عشب تخالط من مجاميع الاشجار
تقول لوحة فن رسم وتصاوير
مع خوة تعجبك في يوم الاخطار
ادناهم اللي تحسبه سالم الزير
خوة رجال هم الكيف والكار
الطيب فيهم كامل دون تقصير
يا حلو خوتهم على كل مشوار
ربع نشاما كلبوهم مناعير
ويا حلو جلستهم إلى شبوا النار
وحطوا عليها دلتين مباهير
وقاموا يجيبون السوالف والأخبار
سوالف الأهل الوجيه المسافير
سوالف في الصيد وعلوم الأخيار
أهل الشجاعة والكرم والتباشير
شروى البرازي ما نبي فيه تخيار
نعم الخوي لا كثروا اهل المعاذير
محمد اللي منوة الضيف والجار
الجار يا من والقرى للمسايير
ما يشتكي من الجار لو صار ما صار
والجار ما يرضى البدل فيه بالغير
هذا الخوي اللي له القلب يختار
مثل الذهب معدنه ما فيه تغيير
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.