شيخة بنات - سالم بن جخير العرجاني

يقول من يهوى ركوب المسرجات
لاجيب طاري للسيوف وسلّها

ياسامعي والاوله من الاولات
تنبيك عن باقي علومي كلها

ترى حلاة الشي لاجاله طرات
واللي تجي في حلها في حلها

شبّه وبرّاد وثلاث مهيّلات
هاذيك اركدها وذيك ازلها

فلة حجاج وطيب راس وطيب ذات
ياقلها في وقتنا ياقلها

في ذمتي ذمه كأن المفردات
تصيح باسمي يابن عارج سِلّها

والله لعديها حدود النايفات
مادمت اميّز دقها من جلها

والكلمه اللي جات مدري كيف جات
زلّه وشرهتها على من زلّها

ياللي تقول النوم أخير من الصلاة
شوري عليك أد الفروض وصلها

يامل قلبٍ بين ود وبين هات
والعين من كثر السهر ياملّها

لاجيت بانسى واعتبر مافات مات
استرجع افكار الحزن واحتلها

وابكي على الفرقا ولكن في سكات
ماهوب شرط ان الدموع أهلها

عليك يانبضي ويا سر الحياة
ياللي غلاها عَزها ما ذلها

شيخة بنات وعلّمي كل البنات
سبحة غلانا مانويت أفلها

مالك غنى عني وانا مالي غنات
والحاقده منهم تموت بغلها

ريقك عسل واساوره سكر نبات
وشفاك ماتبخل عليه بظلها

انتي صفاتك غير عن كل الصفات
اضيع فيها لابغيت ادلها

لبّى البراقع والغطاوي والعبات
يازين سكبتها ومصعب شلها

عندي ثلاث اشياء في قلبي ثبات
والله مااخليها لاقالو خلها

شوفك وشوف الما وممشىً فالنبات
لاخيروني قلت أبيها كلها

© 2024 - موقع الشعر