الـــــــــذرّة - سالم المناعي

الا ياللي تحزّمت ابغلا قلبي وسيفك دم
غدى في داخلي باحلى طعون الحب والمُرّه

هلا بك يابعد زيح المواجع والحزن والغم
هلا بك يالهبوب اللي تنسنس بحري وبرّه

هلا باللي له اشعاري تجيله بالحفظ والصم
هلا باللي ليا نادى تجيه الروح مضطره

اسوم الليل لعيونك واحط سوادك المعتم
وانور لك باصابيعي شموعن واخترع ذرّه

على كون الفضا تبني لك حروف الغلا سلّم
ليا مرّيخي اللي له زروع العشق مخضرّه

تمسكن وردك اللاهف على روض المنى ملتم
وتفوح احلى نسانيس الغرام وتكتشف سِرّه

تجيك الساقيات اللي تعيّشْك الثرى مغنم
تجر الجره اللي جرّتك جرّه ورى جرّه

انا وانته على طيب النوايا ومن سلم يسلم
وسط عالم تلاقي به عيون سهيل محمرّه

تجازيك الورود اللي عطشها مسكة المعصم
تناغم في غصن ذيك الرياض وعيد هالكره

مدامك شي في قلبي ولا ذرّة هوى تقسم
خلايا الحب والعاذل كفانا الله من شرّه

هواك انته نهايات الحزن وبْداية المبسم
وقلبي لو قضى عمره عشانك ويش بيضرّه

انا واللي خلقني ماعرفت اسكت ولا اكتم
على قلبي! على لساني! يجي برّه يجي برّه

تبي تعرف وش الدنيا بدونك؟ ياغلاي افهم
وسوي فيني المعروف , لاتسألني بالمره

حياتي لاغدت دونك تخيّلها نواة السم
وانا من دون قلبك وش بعد تلزمني الذره؟

© 2024 - موقع الشعر