مدهــــــــال الـــــــغـــــلا - سالم المناعي

اصب الشعر في كوب الشعر واسقي ثراه ادلال
وارتب ابجديات المعاني في فناجيله

وانا من ساع ما شفت المعاني تنطفي بالحال
انومسها على كف الشعر بالحال تضويله

وعلى مركب بحر شعري اطال الي تعب ماطال
اشكّل في وصوف الشعر وامرح في تفاعيله

وعلى بحريننا والي ملكها والشعب باقبال
احييهم وانا في داخلي حبن طفح كيله

سلام الله على دارن لها صدر الغلا مدهال
سلامن يخدش كفوف المعاني لين تقويله

سلام الله على دار الكرم والطيب والافعال
سلامن دوم هلّال الهلال ايهل تهليله

الا بحريننا فخرن اجيبك واضربك امثال
الين ايتوب وسواس الشعر في فخر تمثيله

الا بحريننا بعيدك اغني واطربك موال
وانا لامن طربت الشعر تفزع لي مواويله

من اول ماعرفت الطيب ماجاني ابد تمثال
مثالن حي قدامي وكنت اجهل تفاصيله

درسنا الطيب من جهدك , تعلمنا معاك اطفال
كبرنا وطيبك ايجدد مع الايام ماضي له

تغني يابحر حبي وخلي بهجتك تختال
مدام الي ملك شعبك ملك محدن رقى ذيله

حمد يالي طرى اسمك يخرّس هزة الزلزال
كفاية حائك وميمك ودال الفخر تعني له

من محرق إلى دارك تفيض امن القلوب اشكال
ومهما طالت السكه شعوري جاري تحويله

إلي ارض الرفاع ايطل ولو طله على الاطلال
يدور لو نسم طيبك يشع احلى قناديله

من الحد امتطي شعري واسوقه للرفاع اقوال
وفخرن ياحمد شعري يعيش بقربك الليله

حمد لو تبتعد شبرن مثل ماتبتعد اميال
مدام إنها بُعد عنك , بدى الحزن وغرابيله

حمد لجلك نبيع النفس وحمْلك عالظهر ينشال
لو ان الموت ايمدك نبيع العمر ونشيله

حمد تكفى ابي كلمة تعيش ابمعجم الافعال
تُتَرجم كيف افعالك؟ سؤال وصعب تعليله

يصيح المجد من مجدك الا يالفارس الخيّال
ويموت الطيب من دونك ومن غيرك مداوي له

اذا كان الفخر كلمة فانا اشهد هالفخر ماطال
لان الفخْر ياخذ من عروقك دم تحليله

توارثتوا العطى والطيب لي صار العطى منوال
وكلمه واحده تحيي الفعل من دون تمهيله

فخر وان قلت "بحريني" تجيني فزّة الابطال
انا وان قلت "بحريني" يفيض الفخر من سيله

تجرّعت الفخر منّك وادمنت العطى باعمال
تكرّس خافقي نهجك تعلم كيف ترتيله

اذا بالمرجله وصفه فهو رجال بن رجال
واذا بالمعرفه تشهد له افعاله واقاويله

عسى ربي يحفظك ياحمدنا والدروب طْوال
بحق الي خلق عيسى وسخّر فيه انجيله

بحق الي رحم عبده ونزّل سورة الانفال
بحق من علم محمد كتاب الله بجبريله

وتبقى للشعب دايم معه فالحل والترحال
الا يامتعب العالم , بدونك ماغفى ليله

كتبت الشعر وانا في خفوقي للغلا منزال
على ابياتي ختمته لك على آل وعلى ايله

الا بحريننا بعيدك اغني واطربك موال
وانا لامن طربت الشعر تفزع لي مواويله

© 2024 - موقع الشعر