سالف ايامي

لـ عوض الحربي، ، في غير مُحدد، 170

سالف ايامي - عوض الحربي

اخذت من سالف ايامي ما يكفيني
عن قاعة الجامعة وابرز مناهجها

مرت سنين الصبا بظروف تشويني
تدخل همومي وتتعبني مخارجها

اموت واحيا واقول اكيد يمديني
واطيح واقوم واعميها واعالجها

يموت حيلي ولا مات الامل فيني
هذي حياتي وابى امشي في مدارجها

عزيت نفسي ولا فكرت بسنيني
وما اسوم نفسي على اللي ما يخارجها

وما دام انا اشوف عزي صار يغنيني
عن منة الناس لا ساقت حجايجها

ابقى كذا ويش ابى باللي يعنيني
نفسي كفاها مشاريهٍ تخالجها

ما سقتها يم رايٍ ما يقديني
لو ان وسط الحشا مشتب واهجها

ولا احدٍ على رغبته يقدر يمشيني
ولا اصاحب الناس ادور وش نتايجها

ولا اخش في حاجةٍ ماهيب تعنيني
معليني الله لا افتش في حوايجها

هذي تعاليم يا عمار تكفيني
عن قاعة الجامعة وابرز مناهجها

© 2024 - موقع الشعر