تجارب الأيام

تجارب الايام في اقبال واقفاي
عرفت منها عقب ما غربلتني

ما به يمين تعزني مثل يمناي
ولا فيه متن يشيل لي مثل متني

اجاهد ظروفٍ تخالف بدنياي
ياما خذت مني وياما عطتني

لو ما تجي الدنيا على كيف مشهاي
اعيش فيها حر ما طوعتني

لو لوعتني ما اسمع الخلق شكواي
اضحك لهم ما كنها لوعتني

ماني مثل بعض المخاليق شكاي
اصبر على الايام لو ما انصفتني

مهما تحدتني على درب ممشاي
عن الرجوم العاليه ما حدتني

من سيرة اصحابي ومن سيرة اعداي
خذيت منها فايده وانفعتني

ما اطرد ورا المقفي ولا اقفي من الجاي
ولا اعترض لي عالمٍ ما نصتني

وابعد مجالي عن حكا كل حكاي
اصد واترك ربعته لو دعتني

واليا حكى بي مبغض جعله فداي
يكفي مداغيش الرجال مدحتني

ولاكل درب يعترض يجذب اخطاي
نفسي عن دروب المهونه نهتني

اعرف سبايب داي بالوقت ودواي
تجاربي في ما مضى نبهتني

اشكر سنين العمر شكراً من اقصاي
يوم انها بدروسها علمتني