يابو بدر لو قلتلي ويش ماصار
انا خلصت من القنص والمطاريش
بدل براد الجو في حر وغبار
ولا عاد به نيه لهاك النشانيش
صرنا على ماقيل في واهج ٍ حار
ولا عاد به مسرا ولا به مغابيش
الا ليا منه قطب غيم الأمطار
بأول دخول الوسم مزنٍ مراهيش
وعم الحيا خيره على كل الأقطار
من اليمن لديار حمر الطرابيش
حقوق وسم ٍ ينبت العشب وأزهار
وتخضر فياض ٍ عقب ماهي معاطيش
وراع الولع شفق ٍ على ذيك الاقفار
قفر ٍ خلا خده من الدوس مانيش
واليا نوينا مانقلط للاعذار
ربعي وأنا وأهل القلوب الهشاهيش
ومعنا أشقرٍ جثلٍ على كف صقار
طرح الشبك من نادرات الأواحيش
جابوه في لنج ٍ عبر غب الأبحار
وساقوا عليه مع والوساطه بخاشيش
أشقر حمر تحتار به كل الأنظار
ومنين ماجيته عذرايب مافيش
صدوق طلع ووافين عرض الأشبار
وصدره مضيح أفجح وعار ٍ من الريش
شرالخريش اليا أعتلت فوق بأطيار
كنه يشوش بالتفاكير تشويش
وياماحلا من سجتك شبت النار
في طارفت روض ٍ جرومه مهابيش
مع خوة اللي بالمراجل لهم كار
نطاحة الواجب قرومٍ مداغيش
وكد قالها عايش بزينات الأشعار
هذي طرات العمر لو طال حتيش
تمت وصلى الله على سيد الابرار
أعداد مايفنا من الخلق ويعيش
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.