عيد اخر زمن

عيد وعياد وجلسة الشيبان في فيّة جدار
ضحك وسوالف واحتراق العود في مباخره

ولبس الصغار ثياب عيد ولعبهم عند الكبار
وزينة بناتٍ يهربن من العيون الساخره

وعجايزٍ ما يعرفن من الحياة الا النهار
ولا يعرفن من الظلام الا الصلاة ف آخره

عشرين عام تحوّل الدنيا لعالم من شرار
حتى اصبحت أعيادنا باحزان اهلنا زاخره

ما عاد لك يا عيد لا حشمة ولا عزّ ووقار
دام الملابس عند بعض الناس دايم فاخره !!

من لا عرف للجوع طعم ولا تنفسّه الغبار
وشلون يعرف لذة اعياده وهو في باخره !

تقضي حياته من مطار الى مطار الى مطار
ماهوب مثل اللي رياله للمعايد ذاخره

من ضاع له مليون في ليلة وهو يلعب قمار
وشلون يعرف عيد أو حتى يعرف الأخره

العيد عيد اللي عيونه من حصيره في جدار
محرقته الدنيا مثل عود وسط مباخره