مافي حبيش إلا سنامه

بدينا واسم ربي نبتدي به
قبل لا نبدع الشعر ونظامه

وندعي والدعاء الله يستجيبه
ويغفر زلة المذنب وأثامه

وأنا مفتون والفتنه مصيبه
نسال الله عفوه والسلامه

وقلبي ف الهوى زايد لهيبه
وأخاف الناس تلحقني ملامه

يقولون الذي فارق حبيبه
يبات الليل عينه ماتنامه

أتوب من الهوى وارجع غصيبه
وراعي الحب يرجع في كلامه

ترجعني له الذكري العجيبه
ونظرة عين تسحر وإبتسامه

ومثلي كيف يجهل في مشيبه
وأنا مابي هبال ولا غشامه

بياض الشيب له حشمه وهيبه
ومن شيب وصل سنه تمامه

إلى منه جهل كل (ن) يعيبه
ويكثرقول عذاله علامه

ومن يصفي لغيرك واش تبي به
قمر عشرين ما يجلي الظلامه

أخذ كلن من الدنيا نصيبه
حلال الرزق يغني عن حرامه

وصديق المصلحه لا تعتني به
ولا تطمع بلقمه من طعامه

ترى اللي كلمته نمه وغيبه
لزوم يقل قدره وإحترامه

وترى اللي صحبته شكه وريبه
غنامه فرقته والله غنامه

أبو وجهين كلن قد دري به
بعيد عليه درب الاستقامه

كذوب ومفتري والكذب خيبه
ولو يلبس علي راسه عمامه

ولا يفرق حضوره عن مغيبه
ولا يعرف سوى درب الرخامه

غريبه كيف صاحبته غريبه
ومن ياخذ بدال الصقر هامه

نصيحه فارق الخايب وسيبه
تري مافي حبيش الا سنامه

صديقك تعرفه ربي يحيبه
رفع ربي عن الخايب مقامه

ابو تركي وهو سابق بطيبه
شعار الفخر يستاهل وسامه

خوي في المواقف تعتزي به
وهو رمزالشجاعه والكرامه

سديدالرأي شوره نقتدي به
ولا يلحقك من شوره ندامه

وراعي دين علمه نهتدي به
كريم وشهم من منبع شهامه

ختمت وذكر ربي ننتهي به
في اول مانقول وفي ختامه