الرد على الشاعر ناهض اللويش الشمري #شمر - رائد العالي

حي القصيد اللي لفا به كحيلان
الشمري ماخاب من يعتزيبه

من روس قومٍ بالجزيرة لهم شان
مصبّحين اخصامهم بالغليبه

عدوّهم يقلط على حد شامان
يمسي ويصبح بالجروح العطيبه

دقلاتهم منها يروغن الاذهان
يشبع بها ذيبٍ يجاذب قنيبه

شمر ليا دارت رحى كل ميدان
سمٍ على كبد العدو يندعيبه

شمر هل النخوه وذربين الايمان
منهم فعول الطيب ماهي غريبه

لو الكرم مخلوق في هيئة انسان
ليكون من شمر حماة الصعيبة

خلقهم الله للبطولات فرسان
بيديهم تصير البعيدة قريبه

مداتهم تشبه هماليل الامزان
تروى بها جرد الفجوج الرحيبه

لاقيل شمر صار للقول برهان
فعلٍ على وضح النقا ينحكيبه

ياناهض الطرقي تحيه وعرفان
من شاعر يمثل قبيلة عتيبه

© 2022 - موقع الشعر