أنَا اشْهَد انَّ المُوت حَقٍّ ولا زَالْ - راضي الهاجري

أنَا اشْهَد انَّ المُوت حَقٍّ ولا زَالْ
وانَا اشْهَد انَّ المُوت سَاقَ الرَحَايِلْ

وانَا اشْهَد انَّ الله دَايِمْ عَلَى البَالْ
دَايِمْ ورَبِّي مَا يِقَارِبْه زَايِلْ

العين تَدْمَعْ وَايْسَر الدَّمْع هَمَّالْ
وَالطَّرْفْ يَسْعَى بينْ قَايِل وقَايِلْ

جَانِي خَبَرْ مِنْ دَار زَايِدْ وَلا طَالْ
كَلْمَهْ قِصِيرَهْ تَنْعِيَ الشّيخ طَايِلْ

لامِنْ تَعَزْوَى أرْض البْلادْ تِخْتَالْ
شيخَ الشْيُوخْ ونَبْعْ ذِيكَ الفضَايِلْ

لا قِيلْ .. زَايِدْ .. قَالَت النّاس وِشْ قَالْ؟
كَلْمَة حَكِيمٍ ما يَبي لَه دَلايِلْ

تَاجٍ عَلَى الأوْطَانْ وَالتَّاجْ مَا مَالْ
ومَا يَحْمِلًهْ بِالنَّعْشْ مَلْيُونْ شَايِلْ

هَذَا كِبِيرَ القَدْرْ لا جِيبْ وانْشَالْ
يَحْمِلْهْ دَمْعْ العينْ بَرْدُ وخَمَايِلْ

لا قِيلْ .. زَايِدْ .. قَالَت الغِشْمْ ..رَجّالْ!
لا وَالله ألاّ شيخْ كِلِّ القِبَايِلْ

الدَّمْعْ يَحْفِرْ فِي ثَرَى الخَدّ مِدْهَالْ
وَالدَّمْع يَشْكِي جُورْ حَرّ القُوايِلْ

يَا زَايِد الخَيراتْ يَا طَيِّبْ اعْمَالْ
أنَا اشْهَدْ انِّك يالفَلاحِي جِمَايِلْ

لا قِيلْ .. زَايِدْ .. قِيلَتْ.. أفْعَالْ واقْوَالْ
الرّايْ وَاحِدْ مِنْ رِضَى الرّبْ نَايِلْ

لّوْ يِنْبِنِي بِالشِّعْرْ مِليِونْ تِمْثَالْ
مَا يِنْبِنِي مِنْ بُوخِلِيفَهْ مِثَايِلْ

رَبّي رَحَمْ بِكْ فِي عَصِرْ فَقْرْ واقْلالْ
لينْ اعْتدَلْ بِك كّلْ عَدْلٍ ومَايِلْ

أنَا اشْهَدْ انّك يالفَلاحِي لِنَا ظْلالْ
وانَا اشَهَد انّ الطّيرْ سِمِّي هَوايِلْ

الطّير أنْتْ.. وحزّة الحَقّ رَحّالْ
طَيرْ ودَعَاه اليُومْ راعِي الرّسَايِلْ

الله يِعِينْ اليَومْ مَنْ هُمْ لِكْ عْيَالْ
مِنْ حَرْ فَقْدِكْ .. والأمَانَهْ.. ثِقايِلْ

لَكِن عْيَالَ الحُرْ.. مَا هَمَّها اثْقَالْ
العُمْرْ يَمضِي والجِزَايِلْ جِزَايِلْ

يا رجَال زايِدْ حِكْمة الشيخْ مِنْوَالْ
مَا غَابْ زَايِدْ عَن قْلُوبَ الأَصَايِلْ

وانْ قِيلْ .. زَايِدْ .. قَالَت النّاس مَا زالْ
عِطْرَ القْلُوبُ ومَا خَلا الله زَايِلْ

© 2024 - موقع الشعر