المعايدة الكبرى الثانية 1429هـ - راشد الرياحي

يا سلام الله على ربعي دروع امتاني
وعيدكم مبروك من قلبي ونطق لساني

قدم يوم العيد ارتب للجماعه قولي
وربعي الريحات شعار وثقه من داني

والعليمي شيخنا والراي دايم رايه
ولا نقول الكلمة اللي مالها برهاني

شيخنا رايه يصيب وكلمته مسموعة
جعل ربي يحفضك يا شيخنا سلطاني

ويقبل الله صوم من صام رمضان وقامه
يالله انا نطلبك فالعفو والغفراني

العمل مطلوب والتقصير دايم وارد
اجتهد والمجتهد مايعتبر خسراني

راقب الله وانتبه واحذر تراقب غيره
نية المسلم تخالف نية النصراني

دايم المسلم أمام الله قلبه صادق
يدري ان الله ماغيره آله ثاني

الريا واضح ودرب أهل العبادة واضح
يعلم الله نية الريض من العجلاني

طاعة الله تجعل الرجال له مكانه
والشجاعة والفخر في طاعة الرحماني

ولاعبدت الله مخلص واتقيت حدوده
اظرب أهوال الزمان وخاطرك طرباني

الاجل محتوم وارزاق البشر مكفوله
لاتسيد للشجاع وتظلم الجباني

احفظ الله يحفظك تذوق طعم الراحه
وبينك وبين الله المعروف والاحساني

ووالدينك برهم حتى بلفظ الكلمة
وخصهم عن غيرهم بالفضل والاحساني

وانتبه لاقاربك ما تنسى حاجتهم
دعوة المحتاج عند الله لها بيباني

وكان عندك جاه لاتبخل وقدم جاهك
الحضيض يسهل الحاجات للعرباني

ولاتكبر راس مالك تندفن في حفره
في آي لحظة يمكن انه يأخذك عزراني

قلت ما قلت وبعضكم عارفين عيوبي
جعل ربي يستر عيوبي ويصلح شاني

جيت بدعي فالبداية وطلعت نصيحه
واستفاض القول حيث القول من وجداني

لكن آسف واعذروني واقبلوها مني
كلمة الصاحين ما توخذ من الوجعاني

انا شاعر والنصايح من رجال الدعوة
ومن تدخل في تخصص صاحبه غلطاني

انتهى الموضوع هذا وابتدا موضوعي
واعتبر في ماقفي قدامكم كسباني

وارفع أسماء التهنئيه مني الى حضرتكم
ربعي الغالين والطيب وزين اخواني

في محل الشيخ طامي طول الله عمره
صيت ابو ناصر مع شيوخ الوطن كفاني

طامي ابن هديف ركناً للقبيلة دايم
يدري اللي يعرف رمضان من شعباني

ما يقارب نصف قرن وسيرته معروفه
يجمع الريحات ويقلط سمان الضاني

ما خدعه المال والمنصب وقفا عنا
يتفقد ربعه المحتاج والمرضاني

واقعي والواقعية من جميل طبوعه
يرجي الله ما رجا المدحه من السفهاني

من وصل لاعلى المناصب في نظام الدولة
ما التفت لمكبرين الروس بالبطلاني

ولو اكمل مدح ابو ناصر واعد افضاله
والله ان اشيب الطاروق ما كفاني

هكذا هم الرجال وهكذا سيرتهم
أخذ من طبع الحكيم وجمد التعباني

وكلنا ريحات ما فينا قريب وطارف
والتعصب والتفرق ميزة الخبلاني

ما عرفنا التفرقة غير الزمان التالي
انبذوا عن مجتمعنا ملحق النيراني

والرياحي للرياحي من لحمه ودمه
كلبونا نجتمع في سادس الجداني

يالله المعبود لاتفرق تجمع ربعي
يا جليل الملك بعدنا عن الخذلاني

ربعي الريحات لامس الشجاع حزامه
مسندي ذخري ذرى جنبي دروع امتاني

قدم توحيد الجزيرة تحت حكم الحاكم
نحفظ حقوق الرجال ونرتكي للعاني

ما نحسب حساب لصروف الدهر وحتوفه
ان حربنا وان عطينا نغني الفقراني

ولا اعتزينا للمواجه في نهار الهية
الشجاع اليا حضرنا يلعن الشيطاني

ستر ترفات الصبايا عاشقين القاله
مدلهين البل عطايا الله على الحداني

وللضيوف وللطراقي مثل ظل القارة
من لفانا ياجد التقدير والصفطاني

الكرم طبع الكريم ومن صفات الخالق
وسلمنا ما يقبل التحريف والجحداني

وجارنا لو طالت سنينه يكرم دايم
والقصيره من محارمنا عن الحقراني

وفي مجالسنا المعرفة والكلام الطيب
لاحضرنا نتعب الشعار والفرساني

ولا ارتفع للمعركة بأسم البقوم البارق
مع قبيلتنا نعدل كفة الميزاني

دون ديرتنا نسل السلة الهندية
هازمين الترك والباشات في ريحاني

والقبايل مثلنا كلاً على تقديرة
من يعرف الحق ما يرجع على البهتاني

ما نقول الا كلاماً ياردون شهوده
جعل ربي يرحم اللي وحد الاوطاني

تحت ظل ملوكنا بعد الجهل في نعمه
ولا بقا الا الطيب بين الربع والجيراني

ولا تحسب انك غني لو كان عندك ثروة
الدراهم فانية والمودماني فاني

اكسر لربعك جنابك كان تبغا ربعك
ما يباعون النشاما داخل الدكاني

يملكون أهل الوفاء بالطيب قدر وحشمه
ما ملكهم بالحديد الباشة العثماني

ابذل المعروف لله تكسب عباد الله
من يحب الله يحب الخير للانساني

الحسد دايم صفات الناقص المتكبر
تحسد العالم وجيبه بالذهب ملياني

ما نزلت من السما بالسلسلة للرقة
آدمي مثل البشر لازود لانقصاني

والدراهم ما تغير طيبين المبدا
وغيرك اطيب منك لو انه رقد جيعاني

من جمع قرشين لو كانت سلف ومرابا
عد راسة من كبار الروس فالديواني

وفالمجالس ينقرك بالزاوية والخدة
والبغل سمي بغل والا الحصان حصاني

خل في نفسك ثقه واعمل وعامل غيرك
لاتسمع للرخوم وتتبع الديداني

ان سكتنا راحت الايام حادر ساند
وان هرجنا قرت الحبة على النيشاني

المجامل سكت الطيب وعلاّ الخيب
شاخت الخبلان والطيب طلع مجاني

السمرمد للمقاصد يركزون الخايب
والردي يرقا العقوم ويطمر الجرفاني

يكذب ويكذب علية وينبسط ويصدق
يترك علوم الرجال ويتبع النسواني

لامدحنه جاك بعلوم العذارى طاير
يالله ياربي انا طالبك لاتبلاني

كان طيب ربعنا ماعاد ياخذ حقه
اشهدو بالله ما فينا رجا عقلاني

يستحق المدح والتقدير راس الطيب
اعطو الطيب حقوقه والعدو مهاني

وكان روس القوم طاحت واعتلت رجليها
وش نبا بالشعر والقالات والقيفاني

شفت ماشفتوه واظهرته لوجه الشاشة
ماحدٍ يبغا الخطا والمعتبر ربحاني

واعذروني كان في قولي سمعتو زلة
قصدي الطيب على بدع المثل جراني

والسلام ورحمة الله عد قول القايل
وعيدكم مبروك من قلبي ونطق لساني

راشد البقمي
© 2024 - موقع الشعر