مرثية الشاعر / عاضه الحميدي المرزوق البقمي رحمه الله - راشد الرياحي

بالي عن الهرجه ياهملان مصروف
من أمس راسي ما توفق مزاجه

على قناة الساحه أرقام وحروف
يكتب نزيه ويكتبون السماجه

خبر وفاه وغاب عن تالي الشوف
الاسم فالشاشه سريع أدراجه

والعلم مدري عنه والاسم معروف
وربعي لاسلمو ما ورى الناس حاجه

وخذت الخبر وامسيت بالماضي اطوف
ما عاد بيني والحميدي مواجه

يالله يالمعبود يا مسكن الخوف
اغفر لمن حط النواميس تاجه

وعاضه يا ربي ما اخلفه وقت وظروف
سلم الشجاعه والحميا أنتهاجه

لا قامت الصفين طوفاً ورى طوف
ما يبتسم لاشاف فيها عواجه

ما قف ولد مرزوق بالعين مشيوف
الحر ساطي والدجاجه دجاجه

ولاينتقدم بأسمنا هزل وضعوف
سمو البقوم مفرقين العجاجه

رجالنا دايم على الطيب مشعوف
نشرب قراح الماء ونترك هماجه

قلته وانا قلبي على الحزن ملفوف
سيف البقوم الساطي أطفي سراجه

كل تربه تبكي جماهير وصفوف
راحت ميادين الشجاعه لجاجه

طب الملاعب كل جاهل وملقوف
ولا ياجد الشاعر هواه وخراجه

هذي علوم اللي عن الهرج مصروف
من أمس راسه ما توفق مزاجه

راشد الرياحي
© 2022 - موقع الشعر