سادي

سيادة جرحي السادي..تسيد في زمن سادي
بجروح سادت أطباعي وأخذت من دمعتي عاده!

أعزي بالخفا روحي..وأقول لصبرتي:عادي..
لا أول جرح يسكني..ولا أخر جرح وعتاده!

أنا ياللي تعاقبني وفاكر نفسك أستادي
أنا اللي جاهل فيها وهي من فوقك أستاده

أنا مثلي..لمثلك نور للجهال وقادي
وأنا مثلي لمثلك نار على الشيطان وقاده

أنا..ياللي تصاغرني كبرت بيوم ميلادي
وأنا أول خفوق عاف حياته يوم ميلاده

أنا اللي شاب صابرها وتوه عمرها بادي
وهوت من عينها الدنيا وغدت من حزنها ساده

ولا عندي بمصيري علم ولاني جيت بمرادي
ولا أهتميت للنقصان ولاني بطلب زياده

أحدر عن هوى الدنيا وأشوف الناس ورادي
ومع عكس أتجاه الريح أخالف شفي ومراده

أنا بنت العواصف وأنت..ولدت بجوك الهادي
لمثلك زانت الدنيا ولمثلي جات هداده!

لمثلك غنت وحنت وشدا غريدها الشادي
وعلى مثلي يصيح الطفل وتوه بأول مهاده

أنا إلي عشقها العليا..ومثلك عشقهم وادي
وأنا إلي هاجرت للموت ومثلك حاضن وساده

أموت بعزتي وأحيا..أموت وعزتي زادي
مثل موت الشجر صامت ولو الصمت مافاده