عطره الشانيل .. - ماجد الحجري

عطره الشانيل للخافق منبه
منْه تصحى كل ذكرى له جميله

واشعر بإحساس..مدري، بس أحبه
وقمت أدور لجل أشعر به وسيله

واستدارت بالمدور ألف سبه
لين حصل هالمدور وش يبيله

فكره تفاجئ خفوقي ثم تشبه
وسهلة التنفيذ وللذكرى ثقيله

وجبت عطره بالطلب من دار صبه
عطر أصلي نسبته ماهي قليله

وأركب الموتر معي للشوق طبه
وقبل م شْعل في بواجيه الفتيله

في ممرات المكيف قمت اصبه
لجل لا مر الهوى يمي يشيله

وكنت ازود رشتي لآخر مهبه
لجل اشمه مع طلوعي كل ليله

ومن اشمه تنفتح للفكر غبه
محتواها شعور خلٍ مع خليله

ثم شارك عطر ثوبي او غلب به
كنني جالس معه فتره طويله

وتصبح الأوضاع والله مستتبه
من بعد ماهي من اشواقي عليله

ويوصل التفكير بالأحرى ل لُبّه
لين احساس الجوارح يعتلي له

موقفي لاما يوصَّف ما يشبه
ما يعرفه غير من سوا مثيله

والمشاعر تنتمي للي تحبه
وغيرها أفخر بمنهو انتمي له

وايلي حجري من سلالة منبه
وينتشي كل الفخر بإسم القبيله

ربعي الويلان يالغافل تنبه
كم معادي لا نوانا شاف ويله

راسه اللي قادحن به له نذبه
وقلبه اللي صمّله منّه نشيله

وارثين أمجاد من جده وأبّه
حاصدين فعولنا لا جات ميله

وابن وايل بالمراجل إنكتب به
سامي الأفعال، معناز لدخيله

وموكب الأمجاد تدري من ركب به
من تجاهل قول هذي مستحيله

وغيرنا محشوم عن قول المسبه
منهم رجالن يشيلون الثقيله

وكاتب الاقدار هو ربي وربه
كلنا في كل يومن ننحني له

© 2024 - موقع الشعر