انا اللي يابعد عمري بقول ( آسف ) ولو مخطيت !
لأن اكبر خطا منّك صغير بجنب غلطاتي
ابد ماني بقايلك : ترفّق ! ليه ؟ وشسويت !
قل اللي ودك بقلبك تقوله واترك سكاتي
عسى الله لايعافيني اذا من هرجك انغثيت
أشوف ان السكوت ارحم لاني خابر سواتي
ومدامه ( صح ) كل اللي تقوله ، فانت مازليت
واذا زليت هالمره ! نسيت ؟ شكثر زلاتي
نسيت انك تنسّيني الزعل كله الامن جيت
مجرد ضحكة عيونك بنظره تجمع شتااااااتي
نسيت ؟ شكثر تغليني ؟ وكم لك ؟ وانت مامليت
نسيت ان الوفا منّك يذكّرني خيانااتي ؟
نسيت ؟ الله يومنّك علي من الزعل غنيت
" حسبت اشواقنا غابت " وخابت فيك هقواتي
عجزت انطق ولاكلمه بلحظتها سوى ياليت
يجيلك يوم باذن الله وتقراها مع ابياتي
هذاني جبتها شفني وازيد من ( الغلا ) لك بيت
مادام ان القصايد فيك توي في بداياتي
احبك ؟ ايه احبك .. ايه احبك ..آآه لوعديت
من الآحاد للآلاف تملا كل خاانااتي
حبيبي لاتحاسبني وانا ياااما عليك اخطيت
ترى لو مت بيديني غفرلي صدق غاياتي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر