رفرف جناح الغلا

رفرف جناح الغلا . . شيّال
روحه ولا ضن به جيه
 
لاعاد تنشد ( بكيف الحال )
صفحتك من يوم مطويه
 
ماهي ( بلحيه ) على رجال
ان تمتم الشوق في فيّه
 
الحب مهما غدا قتال
نموت وافعالنا . . حيه
 
ياذيب مرقبك كانه طال
لابد ماتظهر النيه
 
بشعة ديارك بلاها . . فال
وانا دياري سعوديه
 
ان جعت مالك عن المدهال
عيبك تكافح على السيه
 
جيتك وانا بي ضيقة بال
ثلاثة اسنين . . متليه
 
صدري من الهم ياما شال
والعيب ماقول وش فيّه
 
اخاف من حكوةً تنقال
وانا عيون البشر ليّه
 
احدً يدور علي مدخال
واحدً تكاتف مع ايديه
 
ياذيب غصن الرجا . . لو مال
اخر علاج المرض . . كيّه
 
( ماجد ابن مهل السليمي )