متضايق

يقول الدفيعه يوم رتّب مثايله
من الوقت متضايق وأعاني هوايله

تبدّل عن إما كان في ماضي أهلنا
قطع صافي أيامه ومد بحثايله

يقدم لنا شره وخيره يشحّ به
وإذا لاح براقه بعيد ٍ نخايله

فكم عاد في نفسي من الصبر والجلد
وعيني تشوف أحلامها حزن مايله

عليها لخفاقي جلاجل وحمحمه
وله هملجه وإهماج فالصدر جايله

فكم صدر أبونشمي من الضيق يتسع
وضجات قلبه لجلجت له نحايله

طلبت الله المعبود يقطع مشاكله
ويدحن بلاويه وينتف حبايله

ومن بعد ياهاجس معي هات ماترى
يخفف عن النفس الحزينه غناي له

من صادق أمزان القصايد ووبلها
ماتزهر خبوت الفؤاد ونثايله

وترعاه خلفات الحبيّب لحالها
من جذور حيده لين حاير مسايله

لها من زهر قلبه وثدّاه ماتشاء
وضال السدر والسمر وراكه وأثايله

وأنا دونها من هرج الأعداء وكيدها
بجنبيتي وببندقي ذا وفاي له

فحق الوفي منّا وفاء حيث ما رحل
ولا بدّله بعده وشدّة رحايله

عهود الوفاء بيني وبينه موثقه
ومن ينكث بعهده فربّي يسايله

فلا أنا بناسي له ليالٍ معي خلت
ولاهو بناسيني ولا أبطت رسايله