رثاء شقيقي فهد يرحمه الله

لـ ، ، في الرثاء، آخر تحديث :

ويلاه من قلب(ن) يفز كل ليلة
وإن جيت أبات والله ما يطيعني يبات

إن جيت أنا أرقد ولو بس قيلة
أو أغْمِض عيوني تصحيني آهات

لوعة فراق الأخ ماهي قليلة
لوعة فراق الأخ كبرى المصيبات

فهد أخويه ما ألاقي مثيله
لو خيروني بين آلاف وميات

ولو خيروني بين ميّة قبيلة
ما ظنّ ألاقيلي ولو بعض الاصفات

ماهو كثير الهرج ولا هو قليله
يوزن كلامه قبل تنطق به اشفات

الصدق طبعه ولا يدوّر بديله
معروف صدقه وبشهادة من اثقات

راعي أمانة ما يخادع عميله
حتى وإن زلّوا عليه بعض زلات

يصبر على خصمه ألين يستميله
حوّل عداواته معاهم صداقات

مثل الجمل يصبر وحمله يشيله
ويصبر إذا زادوا عليه الحمالات

أقفت به الأيام عنّا بغيلة
ما أنذرت لو حتى بعض العلامات

الموت جاه وبدون أيّة وسيلة
فعزّ الشباب هو صار ما بين الأموات

صلّى صلاة المغرب وقام حيله
ناوي يتصدق بالعشاء للعمالات

قبل العشاء قالولي تكفى تجيله
عرفت منهم إن أخويه فهد مات

صلّت عليه الصبح أمّة جليلة
طلبت له الجنة على شكل دعوات

وهلوا عليه الرمل كل(ن) يهيله
وارتجت المعلاة من كثر الأصوات

يارب تغفر زلته إن جات ميلة
طبع البشر يارب لابد زلات

حاولت أبنسى أثرها مستحيلة
أبو ريم نسيانه من المستحيلات

أتذكّر المجلس وأنا أجلس قبيله
أتذكّره إذا ضحك بابتسامات

وأتذكره إن شفت ظلة ظليلة
وأتذكره لا شفت نور وإنارات

وأتذكره لا شفت حفرة مهيلة
وأتذكره لا شفت بعض المعدات

وأتذكره لا شفت طيربمخيلة
حيثه أعرفه يحب قنص الطويرات

وأتذكره لا شفت واحد بجيله
أو شفت قدامي عشاير وخلفات

أتذكره في كل حطة وشيلة
اتذكره دايم وفي كل الأوقات

وأتذكره في كل ركعة طويلة
ولامن سجدت أو إني أقرأ التحيات

وأتذكره لا قالوا اسم الحليلة
وأتذكره لا شفت إحدى البنيّات

قالوا لي أمك تسمعك العليلة
لا تذكّر أمك يابو خالد بشي فات

قلت أمي والله دمعها يسيل سيله
وأنا على فرقاه أهوجس بالأبيات

أستغفر الله واطلبه وأشتكيله
استغفره عشان كلي خطيئات

وختامها صلّوا على أحمد رسيله
نبينا الهادي عليه الصلاوات


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر