بنـت الشـــفـا

قالت انته ثم قالتلي لا يمكن هذول
والله مدري بس خلاص و اضحَكوا خويانها

قلت قولي يا عسى عمرك انتي اللي يطول
واسأليني وين بس وابشري بعنوانها

في الشفا أكبر خبير وأعرفه عرضاً وطول
والهدا ما تصدقين حافظ (ن) وديانها

ودي أقدر أخدمك إن فِعل وإن كان قول
ابدوي (ن) لا فزعت فزعتي بآوانها

اضحكت ألين ما سلهم الطرف الخجول
يا زين ضحكة بيّنت لي عقود أسنانها

استغربت وهي تناظر وقالت يالعجول
ودي أعرف كيف تعرف تقول ألحانها

قلت من شاف الفرس غصب ياعمري يقول
خالقك ربي على وزنها وقيفانها

إش صدر وإش ظهر وإش يدين وإش رجول
وإش شفاه(ن) وإش حَوَر كامنٍ بأعيانها

إن شفتها لابد ما تستغرب الخصر النحول
وكيف لا شفت الخديد تزيّنه خيلانها

إن أقبلت سبحان من يخلق الظبي الجفول
وإن أدبرت ليل الشتاء مغطي(ن) أمتانها

لابسة جنزٍ عليه من كل ألوان الفصول
وبلوزته بلون الورود اليانعة ببستانها

ظني إن ديارها ديار مرتع للخيول
أعتقد من نجد مربى الفرس وأوطانها

ثم قالت باختصار لا تطوّلها وتطول
تهت أنا عن فِلّة أمي وتراها عانها

قلت إن بغيتي تذبحي إذبحيني بالأصول
ما يصير إن المعاليق مع مصرانها

شهّديني قبل ما تذبحيني يالعسول
يرحمك ربي وأبوك و أمك وجدانها

ناظرتني ثم قالت والله إنك امْهَبول
الوداع الوداع وأقفلت بيبانها