فخر الوطن..الامير/سعود الفيصل

لـ سلمان الوهيف الرويلي، ، في غير مُحدد، آخر تحديث

فخر الوطن..الامير/سعود الفيصل - سلمان الوهيف الرويلي

فخر الوطن عز الوطن كله سعود
الصارم اللي ماخضع بالسياسه

من هيبته ترجف حكومات وجنود
وفكره يدرّس بالسياسه دراسه

تشهد عليه بحنكته أربع عقود
وعهد الملوك اللي مضو بالرئاسه

ولليوم باقي أبيض الوجه ويذود
عن الوطن في كل حب وحماسه

إليا تكلم يرقب العالم شهود
يخشون من باسه..ومن قو باسه

يقدح برايه دون خوفٍ ومنقود
والراي من راسه..ولاذل راسه

كل المصاعب لاحضر صارت سهود
يحلها في حكمته والفراسه

وإليا وقف كل اللذي حوله قعود
من هيبته محدن وقف في قياسه

لو العرب تمشي على منهج سعود
ماكان نرجي من النصارى حراسه

ومبطي سمعنا بالمثل قول وردود
كلن تعوّد قوته من أساسه

أبوه قبله وقفته مالها حدود
الغرب كله لأجل الأسلام حاسه

يوم الدول خانت مواثيق وعهود
والكل يدعم لليهود بدساسه

قطع مداد النفط..والصلح مردود
وأعلن جهاد الفرض..والذل داسه

والله لو هو عاش لليوم موجود
سدنا على كل الدول بالسياسه

© 2024 - موقع الشعر