هدوء الليل

لـ يوسف السناح، ، في غير مُحدد، آخر تحديث

هدوء الليل - يوسف السناح

على بداية هدوء الليل سقت الفكر
المسبحه في يدي والقلب عابر سبيل

وعلى مدار التجارب واستناد العبر
وجدت جرة قدم وادركت معنى الدليل

كم طمرة احصان يكسبها ليا من طمر
وكم كبوتن مابعدها غير هم الرحيل

وكم لحظة تنتظرها بعد كثر الصبر
وتروح في ثانيه ويضيع رد الجميل

ومابين هذي وذيك ايقنت معنى الحذر
من جرب الشمس مره شاف فضل المقيل

واللي يمد النظر من دون وجهة نظر
يبا يشوف الكثير ويستشف القليل

واللي يقول العمر للحين تو العمر
ينشد سجين السهر وشلون ليله طويل

اقولها والهموم احيان مثل الجمر
لاصار زند الهوا يقدح بخشم الفتيل

انا جريح الهوا وانا رفيق السهر
ان جيت اقول الشعر وان قمت اعد الحصيل

طبيت بحر الهوا وازريت اعبر البحر
لو ان برق الامل مازال قدمي يخيل

احيان بالشوق اغني فوق سطح القمر
واحيان بالواقع الملموس كني قتيل

© 2024 - موقع الشعر