هــب القصـيـد ولاح بـرّاقـه

هب القصيد ولاح برّاقه وداعبني هواه
وانا اتحرى الدره اللي تبتهج منها الصدور

اسقي منابتها عنايه لين تخضرّ النوّاه
واستصلح من ارض القصيده بالعنايه كل بور

ارقي لها قمة طويق وقمة جبال السراه
واتعب لها تعب هوّاة الشرد واسراب الطيور

حتي يصير إلها بعين اللي يقيّمها حلاه
والآّ يذعذع ريحها لا قدمت مثل العطور

لعلها تكبر بعين اللي مشرفني ثناه
النادر اللي له مع أهل الطيب والوقفات دور

سليل عبس أهل المرؤه والصناديد الدهاه
أهل السيوف اللي تشيل الرؤس وتفج النحور

فيما مضى يوم الزمن قاسي يضدون القساه
واليوم تحت الرأيه الخضراء يحرسون الثغور

وأفين فالخوه وفي الجيره وأهل نخوه وجاه
لوباروا اصحاب الرخاء يبقى الرشيدي مايبور

ياخليف راع الطيب يلقى مثل ماقدم جزاه
ونمد للطيب يمانينا لجل طيبه جسور

وبيوتك اللي عطرها الفوّاح صافحني شذاه
وش لون أحصل مهرها اللي مايشابه للمهور

نقيتها من وسط روض ٍ ماحد ٍ يدخل حماه
ورسمتها في لوحة الابداع بأفكارك سطور

هداج تيما لو نحاول ماحد ٍ يلحق مداه
ترده طروش البدو وتصدر وهو جمه يفور

واسلم ودم ماذعذعت في نجد واطرافه صبّاه
والعذر يانسل الكرام ان كان جاء فيها قصور