أنا الشموخ

لاغبت جيت وغيبتي كنّها حضور
أسمي يسّد بغيبتي في مكاني

ماني من اللي لاحضر يمسك الدور
أنا الأمام وغيري يصف ثاني

وماني من اللي يكثر الهرج ويدور
موتي ولاهرج الردى من لساني

وماني من اللي يجزي الطيب بقصور
وأشوم عن راعي الردى والاناني

أنا الشموخ اللي تعلّا على النور
وأنا الفخر لأهل الفخر والتفاني

الله رفعني عن وطا كل محقور
أشمخ سما لادنقّو للطماني

إن كانها بالطيب بالطيب مخبور
وإن كانها بالشعر فلتت زماني

شعري يجمّل لاحضر كل منعور
يقلط على جزل البيوت السماني

أغوص ببحور الشعر وأعبر بحور
وأتعب على حبك الشعر والمعاني

وأجيب قافٍ كنّه الوصف بلوّر
يطرب عليه من يسمعه بأتزاني

هذا وتوي بالعمر صرت مشهور
وشعري ينومس بالحفل من دعاني

وللحين باقي يطبخ الراس ويثور
وعندي طموح مدّعماً بالأماني