هنا باريس

أريج الورد والليلك مع خلطة صباح النور
على وجنات شوقي لك يغازلها شموخ التيه
صباح الحب يا سيّد حنيني والهوى معذور
مقسّم كيف ما تدري أحد ياخذ واحد يعطيه
صباح الخير مشتاقه بلهفه جامحه بشعور
بكل الكبرياء اللي في قلبٍ هزّني راعيه
صباح الخير والغربه بتنحت هيكلي طبشور
جسد فارغ من احساسه مجرّد صورته تحويه
هنا باريس يا قلبي بلاد الساحر المسحور
هنا باريس للعاقل انيقه همّها تغريه
هنا بتشوف شي ثاني أوادم حيل تلف تدور
أواودم همّها تاكل وتلبس والقيم مافيه
تعال احكي وانا بحكي نقول اخبارنا بالدور
شوي نضحك شوي نبكي وظامي شوقنا نسقيه
أنا يا سيّدي من رحت باريس الشقا بشهور
بدت رحلة معاناتي في حاضر ما انعرف ماضيه
هنا كلّه على الموضه ملابس .. اجهزه .. وقصور
يبوني أرمي حجابي واقصقص غرّتي ( كاريه )
هنا تتعلّم ال( ميرسي ) واذا صبّحتهم ( بونجور )
هنا تنسى كلام الله .. تصير تقول لهم ( بون ويه )
لعنت ايام هالغربه وصحت بصوتي المجهور
(أبي امي . أبي خالي . أبي جدّي ) سفر مابيه
بدو حنّا اذا شانت نجيب الجنّ في طابور
واذا ما زان واقعنا نجيب العالي لواطيه
ترى ما همّني لفظي مكسّر او طلع مجبور
قسم بالله اذا قالوا ( حنان ) اقول لهم لبييييه
بلاها طول هالسيره تعال وشوف هالمغرور
شخص حاقد على الاسلام بدون اسباب مدري ليه
ذا يا سيّدي باحث حقود ودايماً مقهور
عشان حجاب يكرهني وجاب الهم وابن آخيه
ياشين اسمي اذا قاله ( هنان ) يطلّعه مكسور
بلاك الله من عنده يا ( مسيو فرانسوا رينيه )
جلست ايام انا اتعلّم ابنطق اسم هذا الثور
وانا اسمي أربعة احرف يجيب العيد دايم فيه
مثل جسم البغل كبره وفي راسه حلم عصفور
ولكن ما علينا اللي يريده ربّنا يسوّيه
الا قلّي وش اخبارك اشوفك هالشهر مطيور
تبذّر حيل يا خالي وش اللي عندك مخبّيه
لقيت كنوز علي بابا ؟ سرقت البنك بالساطور ؟
يا إمّا تدبّل الراتب . . يابختك جايه في الاوكيه
وش اخبار الوطن ..جده .. وحارة بيتنا والسور
على الله يابحر جده على شوفك تنام وجيه
ألوو وينك ؟ معي انته ؟ معي انته ؟ ألوو منصور
حسافة انقطع خطّك قبل ما تقول ياللي تبيه