لعيون محبوبي

لعيون محبوبي كتبت القصيده
ومهما كتبنا فيه ماضن نوفيه

أكتب شطر وامسح شطر ثم أعيده
عجزت في وصفه ومن وين اببديه

ياناس وصفه صعب محدن يجيده
كل الوصوف النادره ساكنه فيه

جمال وأخلاق وعسى الله يزيده
وفيه الحلى سبحان ربِ مسويه

وفيه الخصال الطيبه والحميده
وهذي من اطباعه وهذي مباديه

وعليه نطق تقول يلقي نشيده
كأنه مقفى وبسمي قوافيه

لكن قبل أسمي أحبك أكيده
في كل موضوعن ليا جاء بينهيه

في كل يوم أكتب قصيده جديده
وحروف شعري كلها تفتخر فيه

حتي لو ابنهي قصيدي أزيده
كن الحروف الابجديه تناديه

ياأجمل حياتي يالحياه السعيده
ياروح شاعر طلع اللي يخبيه

اي والله أحبك محبه فريده
من نوعها والحب لايمكن اخفيه

الحب وصلك ياحبيبي يزيده
والقلب ماغيرك يميته ويحييه

أمر تدلل وأطلب اللي تريده
كل شي لعيونك أجيبه ولبيه

هذي مشاعر قلتها في قصيده
واللي كتبنا فيه ماضن يوفيه