محكوم

لـ غير معروف، ، في غير مُحدد

محكوم - غير معروف

كل يوم همّ الموت يرسم لي خطاي
ويفتّق آمالي وطيني يبله

والعثره لامن جاتني (تحب) ماطاي
من (بِرّها )صارت دروبي ممله

برثي انا نفسي ويا حزنه رثاي
لاصارت أيامي تُقدر بثِلّه

بودّع السجن الذي يشهد بكاي
بنصاف ليلن ضاق من حال خله

قالوا على كف القدر صار ممشاي
والموت يطلبني وحاجز محله

والوقت يشنقني على باب رجواي
ومابقى بالجسم ياكود ظله

لملمت بعض اللي تناثر من اشلاي
ودموع عيني بين كثره وقله

حتى لهيب القلب ماعنّ لشتاي
من هول موقف بعثر الصبر كله

مع فتح باب السجن قد خارت قواي
ماعاد للابواب دربن ادله

ساقوني وسمعت الدعاوي من قفاي
ربي يجير العنق من سيف تله

والموقف اللي لاح طاريه بسماي
يشهد على هوله غياب الاهله

لا فج قلبي صوت جاني من اقصاي
من قام قايدهم لسيفه يسله

قرّب وصار السيف منصوب بحذاي
كنه انتصب في وسط صدري بغله

قال (الشهاده ياولد) ....قلت سلواي
دام الحظوظ اليوم صارت مقله

اوصيك بامي لنقضى فيني الراي
لا تلطم الخد الذي زاد بله

قولو لها لاتطوي اليوم مركاي
واجمل ثيابي للمياتم تشله

والوالد اللي كان عوني بمسعاي
بالله ارحمو شيبه ودمعن يهله

قولو له اني كان يسبقني مناي
انك تشوف ابني وبسمك سجله

وانا بعز الكرب غنّت لي ورقاي
ابشر بفرحن يسبق ادناه جله

من وقتها نار الصبر تحرق حشاي
والخوف لشعوري غدا مستحله

قمت ادعي الله يجعل اليوم ممساي
محكوم بامر الخير والعفو حله

لكن يد السياف قد شقت رداي
والسيف عانقني بعقدن ومله

والروح زفوها على عزف فرقاي
والجسم تنعيه العيون المطله

هَلو التراب وتَممو باقي جزاي
معه اقبرو باقي حلومي المقله

هذي نصيحه ياولد والعلم جاي
خلِي العقل حاكم ..على الله وِكْلًه

لاتحسب ان الدم من عدة الماي
ولاتمشي دروب الوغى دون دِله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر