شموخ القصيد

شريت من سوق الفكر باقة إبداع
ودفعت فيها غاليات المثامين

ميزتها واخترتها بين الانواع
من باب لقالوا ترى الزين للزين

وعطورها فاحت مع كل ذعذاع
ولا يميزها يكود المحبين

خليت باولها رموزٍ لمن شاع
حبه بقلبي والبلا باعد البين

أبوعيونٍ وصفهن سود ووساع
طيفه يعاودني ومن حين الى حين

لبيه ياطيفٍ برى كل الاوجاع
ليتك معي دايم على العسر واللين

قلي ورى راعيك مقفي وجزاع
أقبل علي بقلب وأقفى بقلبين

صبرت لو أخر هوى النفس الاقناع
واخذت من فرقاه هم وسهر عين

يا طيف قله ما جمعناه ما ضاع
وإن ضاع ثلث الود نبدا بثلثين

دنق عليه ولتراخا بالاسماع
قله ترى نايف يحبك لها الحين