قصيدة حكمه

قال عود كبر وأعتلاه المشيب
وأنحنى مثل قوس يتالي عصاه

طاح قدره وحاله ولابه مزيد
وإن مر من عياله صغير عصاه

يوم عنده حلال وقوله يطاع
يركض الكل مهم بزاده وماه

الرجل كل ماقل ماله يعاف
وإن عمى بالكبر عمس رايه وباه

أنكروا مامضى وجحدوه الجميل
يوم حقه ورد وأكمل اللي وراه

يامجلى تسمع نبا من فهيم
وافي بأصغره قاصرات عضاه

عارف باخص في جميع الأمور
إن غدا الراي عن دايريته لقاه

لا تناسب بخيل كثير الحلال
مهنته كل يوم يقيس عشاه

ناسب اللي يرحب إليا جو جياع
والتبسم بسنه من أول قراه

ولا تلين جنابك لمن هو ضديد
أو عدو يداهن بقلبه بلاه

والحريب إنحره قبل يقبل عليك
وإن تنيته يزورك بدارك مداه

معلق مخلبه والطمع بك يصير
إضربه غارة لين تقلع مداه

من جبن عن عدوه يصلط عليه
لبخل والجبن للمعادي مناه

كل من داس ضده وغورب عليه
خذ بها مدة ماتمثنى حماه

والصديق إعرفه وإذخره للمضيق
ذب عنه بوجهه وتحما قفاه

والمره ضمها إليا عرفت أمها
ثم صن عرضها لا يقرب خباه

البديوي إن عطيته تسلط عليك
قال ذا خايف مار بالك عطاه

إن ولي ظالم مفسد للكمام
وإن ظلم زان طبعه وساق الزكاه

مثل كلب إن رمى بفهر يروح
وإن رمى له بعظم تبع من رماه

حاكم وياكلونه ومنهم يخاف
من رخامته ماهنين ثواه

وحاكم داواهم بفعل يشاف
كلما خالفوا لحق فيهم مناه

كل يوم عليهم صباح شرير
غير ذبح اللحى عزل بوش وشاه

مثل جنس الحبارى تعرف الطيور
حين ماجالها موحت من سماه

نادر الحر يدعي عضاها لهوم
والتبع تطرده مرشة من خراه

هيه ياراكب فوق حمرا ردوم
من خيار النضا طبعها ماحلاه

عيبها زورها ماينوش العضود
خفها سالم مارقع من حفاه

يانديبي على كورها تستريح
فرجتك ساعتين بحفظ الإله

من بلاد القصب سر وتلقى شريق
ديرة بالوشم قابلتها مراه

ديرة للعزاعيز سقم الحريب
علها الله بالوسم وصيف قفاه

عمهم يانديبي سلام جميع
عد ماهل وبل وهبت هواه

قل لهم شوري اللي مضى من قديم
بالهم يخلفونه يجيهم قضاه

إحربوا وإضربوا دون حدب الجريد
وأذكروا قول حاتم ولاشي سواه

موتكم بالبواتر لكم كبر كار
وموتكم بالتواجع عليكم زراه

من ذبح دون ماله وحاله شهيد
وإن حيا بالسعادة وله كبر جاه

لاتحسبون من ذل عمره يطول
فإن ذا الموت لابدكم من لقاه

جدكم رخمة ماكر للطيور
لهس العنقري كل حلاوي نماه

وأظهره الله عياله وسبب عليه
شور عود فيهم قليل خطاه

افطموا من فطم ديد من قبلكم
فطمة الورع عن ديده اللي غذاه