ياراكب اللي يسر العين في زوله
وتروج عوج المحاني دون مركابه
ماكنه الا اشقرٍ مابان مدهوله
مسعاه يطرب هلَه ما شيّ به عابه
ماساقه اللي هواه بدوله ودوله
ماجاد به كود قرمٍ يدرك اسبابه
عشق الفتى فوق متنه لا بدى هوله
اشهد يقين انه يجمّل بطلّابه
كنّه وهيبة عطا للبيد مرسوله
غير المفالي حشى يطيب مشعابه
صلب الشداد وعليه الزهب مشيوله
وخطاه حثّت على القيعان منسابه
مابين مرباعٍ من البعد ياتو له
وحزومها والفياض وقاصي الطابه
جرد الصحاري لو ان الكبد معلوله
طبٍ يداوي مشِيب الوقت ماشابه 
الطيب طيب الثرى والرمث وسهوله
خنة عبَقها عن اللي بارت اطيابه
اعجوبةٍ ياعرب ياكيف مجهوله
اعجوبةٍ بالحشى متراكم اعجابه
من نايفات الشمال ومن بدى حوله
لاتلا شهوق الجبل والي فهق بابه
اي بالله ان الهوى والروح مجبوله
على الشغى والدوى والواد وشعابه
يقوله اللي تسابق غايته قوله
بدعٍ تهامر من الاعماق مصبابه
الشوق شوق الفتى لا صابت فعوله
يم الشغى والدوى والواد وشعابه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين