بدون صلاحيات

خايفة يجيلك
حاكم يسكن
جوه قصورك
مها غيره كان
ساكن
وكمان بيخونك
ويزقيكي المر
ف طعم يسُر
وغيره يمر
على زيتونك
وغصونك
وأنا دايخ
من أجل أصونك
وبأصونك
من غير تقصير
دا أنا خايف
على ابنك قبلك
حاطه ف قلبي
وأنا قابلك
بقانون تفصيل
ولغيري بتفتحي
مليون باب
مع إنه
ف قدمه خراب
وكان حاكمك بالمخلاب
ألف غراب
وأغراب
بحكم الغاب
دايسينك
وناهبينك
وسارقينك
وأنا اللي جاي
والحلم معاي
أنور لك
طريقك زين
وفارد لك الكفين
لكن فين
وأنتِ قافلة بوابيبك