المعلم والنقل - رائد العالي

يازينها لاقيل لك تم نقلك
وياشينها لاقيل لك مانت منقول

الأوله فرحه تنسّيك عقلك
والثانيه حزنٍ يخليك مذهول

والياس من خلف الأمل ينطلق لك
ياخذ على صدرك من الحول للحول

ياحضرة الأستاذ قدرك وثقلك
مانقّصه تفكير حاقد ومعلول

إن كان برّاق السعد مابرق لك
اصبر ولا تجزع ولو صبرك يطول

لابد بيبان الفرج تنفتق لك
من يد كريمٍ بامره الصعب محلول

لايخدعك تصريح من لاصدق لك
مايعمله ضدك وهو عنك مسؤول

بدل عمل تسهيل كل الطرق لك
اصبح يقفل كل الابواب بقفول

يبدع بتحطيمك لو العذر صقلك
وانته صقيلٍ من تجاربك مصقول

معلم الجاهل وفضلك سبق لك
على يدينك تثمر افكار وعقول

عسى لسانٍ بالعدل مانطق لك
يعيش ماباقي من العمر مشلول

والله يحقق لك طموحات نقلك
ولا يردك عن مطالبك مخذول

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر