معلّقة ملحمة القبيلة

لـ طالع بن صايل القطش الحربي، ، في غير مُحدد، آخر تحديث

معلّقة ملحمة القبيلة - طالع بن صايل القطش الحربي

سر ياقلم وانقض كلام المثارين
صدنا الهدف يوم ان ربي قدانا

نرميه باللي تقسم الراس قسمين
في وقتها واليوم جاه امعنانا

سرساح جانا ثايرن عقب عامين
فزّاع والفزّاع يلقى لقانا

لو كان ماحنا عليهم حريصين
ولا همنا راع الحكي لو حكانا

لاشك رد المشكله ثالث اثنين
من بعد جاه اشيوخهم ووجهانا

متجاهلن سلم العرب والقوانين
سرساح ملعون الجدف ماغوانا

ماادري علامه يدرق الناس بااسمين
يافهيد ياكديميس يابو لسانا

قصدك تبيها لعبة ٍ فوق حبلين
والا ان بااسمن من حديهن طمانا

اهل الحيل والزيف ماتوا فقيرين
تنعاك والله عيشتك يالجبانا

ماهو هلابك ياوكيل المولين
يالهمشري مااضن عقلك تكانا

يامحرك الفتنه خفى وانت ماتبين
اللي تخفى من مباديك بانا

حقير تمشي في مماشي حقيرين
يامثور الفتنه بضل الأمانا

ورثت حجة من على الدرب غادين
ورثت ساية ماورثت الحسانا

اثر العصمه يبيارثون الدماسين
بالخبث والعلم الردي والهوانا

حدرك من لااظهرك يامنقع الشين
تاخذ على شعار حرب الضمانا

ان كان ماتدري عن الشين والزين
حنا نعلمكم عيانن بيانا

وان كانكم في شعركم مستغرين
انتم إرسوس ٍ ماتبلل جمانا

وان كانكم في فعلكم مستعزين
العز قدامك وسامه زهانا

يومن للهيجا مجال وميادين
ننزل ديارك ماتقرب احمانا

ننزل ديارك بالسيوف ام حدين
وشهودنا ذاك الزمن والمكانا

الوقت بيْن والشهود الاكاوين
عرجا وطخفه من ديارك ضمانا

وانتم إبما قلنا لكم مستقرين
والناس تدري والخبر مايخفانا

ومن القبايل نعتبركم موالين
وانعزكم لو طيبكم ماوزانا

قلتولنا ياحرب حنا قريبين
انتم لجيتم يمنا مالجانا

قلتم شبابه من عصور القديمين
وقلنا هلا طبعن لنا من زمانا

قولت هلا للضيف والمستحقين
طبعا ًعليها ساسنا من بنانا

وان كان قلت اليوم منكم بريين
حنا ماحنا بحال من لا بغانا

حلوين في حاله وفي حال مرين
الله على الدرب الصواب يهدانا

حنا بحزات المعارك ضريرين
كل القبايل شاهده واخصمانا

ولو تنشد اللي حاضرينن هكالحين
كان اقنعوك بما مضى واكتفانا

عاداتنا نمهن رسيم المعادين
ندرا الحقوق ولا نهاب اخصمانا

والا انت عاداتك تخون القصيرين
خنت القصيره والخوي يالهدانا

وعبيد قال بما مضى منك بيتين
يومن أخوك برميْتك ماتوانا

طبعن لكم من ساس ماهو بذالحين
ياعصيم جوزوا مالكم في نحانا

أول خيانه في جماعتك الادنين
وقارن مابين اغزايتك وامغزانا

يومن روق سندوا عنك غازين
غرتم عليهم خونتن يالذهانا

وجبتوا أباعرهم ولا انتم بسيطين
الغدر فيكم من قديم الزمانا

ابل الجذع منكم وفيها معيين
خنتم وحنا مانخون اقصرانا

وجيتم تحسبون انكم مستدلين
خوان مير الله بوجهك رمانا

وقمنا عليكم قومتن تعجب العين
جبتم طمعنا والرجال ايسرانا

ولانتم لنا ياقوم حجله لديين
يوم انها توخذ بحد السنانا

مافي عصيم إلا دورت الملايين
كد بيْنتها حرمتن باقبلانا

يومن ولدها طاح بين المثارين
عند الجحادر يوم هاك الكيانا

وقامت تصيح وتزعج الصوت صوتين
وقلتوا لها في حر ناره صلانا

ولولا الله انقذها بشيخ الدعاجين
ان كان راحت بين هانا ولانا

يامصيبغه مانتم على الفعل جسرين
خص ٍ اليا مس الحدب والبطانا

حنا هل البل شاربين الغلاوين
خيالة الوضح التلاد السمانا

ترعابنا دار المخافه زمانين
وناطا على خشم العدا في احذانا

نمر الادنى وانتعدى للاقصين
ماحدن يحدد سرعنا من بطانا

حرابة العدوان بالضد قاسين
الطيب فينا والقسا من قسانا

وان كان ماانتم للحقايق جحودين
وادي رشاكم صار وادي رشانا

حنا ليا اقبلنا عليكم ثقيلين
ومن هازنا ماردنا عن هوانا

ياما كسرناكم وصرتم ذليلين
وياما اغتنا فقريْنا بمغزانا

وان كان تذكر خضعنا للسلاطين
انتم خضعتم عند شيخ اقحطانا

تسعين عامٍ تحتهم مستذلين
غير الرتاعه ينكسبك حسانا

وشيخن نزلبك نجد عقب الضلاعين
ماهو عتيبي ياطويل الاذانا

بأصله وفصله ياابرق الريش دارين
جابه لبرقا حضها يوم زانا

عقب الكريزي من رجالٍ شريفين
والا انت قبله ماعرفلك مكانا

منزلك في قولك ورا حضن ويمين
يوم اسمكم ذاك الزمان الهزانا

حنا هل الدنيا وحنا هل الدين
والدين وصانا نطيع اوليانا

الرب وصابه وبالحق راضين
والدين عز إنطيع له من هوانا

ماهو غصيبه بالرضا يامساكين
غصيبه البل يوم جوك اعقدانا

يومن ابن حجنه وربعه إمحلين
مع ذودهم من عند ريع اكبشانا

شفنا هل البل دونها مستعدين
و اغرنا عليهم جمعهم ماحدانا

في رأي اخو بقشه صعوط المجانين
دارت على زيزوم ربعك رحانا

وجاك الحنيني وابن سعدى مغيرين
وحدوك لاما جيت ضلع احلبانا

الخيل حزب والسرايا مكامين
ومن شذ عنا طاح عند اقربانا

ماجوك حاديهم مخافه ولا دين
جوكم عقب رد البرا والمثانا

جابوا طمايعهم وجونا محيلين
واثباتها ماقال فيه اشعرانا

والكون الآخر صادكم فيه حثلين
وقت الضحى شوفن بياناً عيانا

خلا جنايزكم سوات الخرافين
واللي سلم ماقال وين اخويانا

خيال واحد زفكم زفت الضين
وعاداتنا من قام منا كفانا

انتم سوات العنكبوت ام خيطين
خيْل لها قوْ الخيوط المتانا

ماقلدت باللي يحطون دورين
وبيوتها ذكرت بيوتن وهانا

يومن هرجك مايصيب النياشين
حنا نصيب اهدافنا بمعدانا

هذي عوايد ربعنا يابو قلبين
نعمي عيون اللي يداورعمانا

ياللي مذاهبكم تقلب على وين
تقلبون و كل يوم إبلانا

مادام حكام الشريعه حريصين
ومطبقين احكامها هو ارضانا

حنا بضف اهل العداله عزيزين
تدرا مهابتنا وتحشم لحانا

وإلا انت تدقم لحيتك دقمت البين
دايم على تصميم نفسك تهانا

و تذكر لنا عند اصطفاق الحريبين
تقول صار حجاب ضمن منعانا

وحجاب شيخ القوم سقم المعادين
ماتقدره حرز الدروع المتانا

ربعي بساحات الميادين صلفين
كم فارسن ضيع يقينه حدانا

وتقول جانا من طرف نجد جمعين
ماجاكم إلا الفرم زبن الحصانا

طار اليقين وقلت ناسن كثيرين
واللي غزوك نعدهم بالبيانا

سربة حمول الخيل لو هم قليلين
عاداتنا نكثر بعين اقبلانا

من فوق قبن تدّب الجمع وتهين
صوت السيوف ابمعتلجهن لغانا

ان كان تجهلنا للاكوان مضحين
كم سابقن جتنا تجر العنانا

حنا ليا منا نويناك صاطين
لو جمعكم مثل الصفاء كان لانا

والذم ماهو زين مانتم رديين
وحنا عليكم صلطتن من سمانا

وكان انها تحقيق جيمن بعد سين
فينا الجباره والعيا من عيانا

واللي نوانا بالردى فيه ناوين
يستاهل اللي بالهزيعه نوانا

على المشاكل والشتيمه سريعين
ويش السبب قولوا لنا يااعملانا

اللي مضى عنكم نحينا مصدين
وياما سكتنا لين بيِّح خفانا

واليوم هاتوا كل ماانتم مخفيين
وحنا حلفنا مانبقي ورانا

حنا على العتبان من قبل عازين
الله يجبر في عتيبه عزانا

ولو ماحشمناهم نحشم الاديبين
ندرا على سمع الجميع أودبانا

والشعر ادب ماهو بلعبة بزارين
قولوا لمن دف الخزا واشتكانا

يامصيبغه وش فيك قمتي تخورين
الا ان شانك باللغا غير شانا

تبقين بالحقران لاما تموتين
والهرج مايشفي القلوب الحزانا

© 2023 - موقع الشعر