والله انها دمعة العاشـق علـى معشوقـه

لـ رشيد الخليفه، ، في الغزل والوصف، آخر تحديث

والله انها دمعة العاشـق علـى معشوقـه - رشيد الخليفه

ياسعد علوش حرفك كل ما غنيته
قمت ابا اطلق عبرة باقصى الحشا محبوسه

ضاع عمري ياسعد باقصى الحشا كانيها
واثرها تنخر عظامي مثل نخر السوسه

هاضني حرفك وذكرني طرب محبوبي
يوم اغني ينتشي ويذوب حد الهوسه

ياسلام الله عليها يوم جات تهوس
كنها بين العذارى ياسعد طاوؤسه

ياسقى الله يوم انا توي صغيرن جاهل
يوم رمسني بعينه مافهمت رموسه

يوم هي تسع وانا توي ثمان سنيني
وجات تشرح لي تقاليد الهوى وطقوسه

قلت والله ياغزال الريم ماني فاهم
وش حكت لي سلهمة طرفك ورفعة قوسه

قالت انته ما تعرف الحب قلت الها الا
قالت اشرح لي عنه بالشفره المطموسه

قلت حبي لعبة الكوره وحبي لامي
وحب ابوي اللي رفعت الراس من ناموسه

قالت انا يارشيد اليوم ويش اعني لك
ويش اصير بخافقك وشعورك المحسوسه

قلت اجل به حب ثاني خافين مدريبه
قالت الحب العفيف اليا اثمرن غروسه

يارشيد افهم شعوري وش تشوف بعيني
قلت اشوف اسرار بحر ودرة محروسه

لاهدا موج البحر صارت شواطي راحه
في حما صفات جيش والسواد لبوسه

وشفت ثلج مايذوب وجمرة وهاجه
وليلن اسود باديات بالظلام شموسه

صورة جذابة سبحان من صورها
خلت الطفل الغرير يفوق من كابوسه

ايه انا توي فهمت اللي يقول الهندي
يوم رحنا نشتري من عنده البسبوسه

يوم قال اصحى وفتح يارشيد عيونك
قدم عيني شفت قلبك باقته نسنوسه

والله انه ماقهرني غير شي واحد
كيف يفهم ماخفاني عابد الجاموسه

قالت افهم منطق العشاق يا تلميذي
واحفظ اسرار الهوى لاينطفي فانوسه

يارشيد ان بكر الوسمي وشفت بروقه
انحره لآ تحتري اخباره ومدح عسوسه

الربيع ان شفت مخظاره ونبت ازهاره
اقطفه قدام لآ يذبل ويكثر دوسه

لآتفوت فرصة بالعمر ما تتثنا
مايعوضها قليل المعرفه بفلوسه

وافترقنا عقب صوت مناديأ ناداها
يوم جاته بالخبر من يمنا الجاسوسه

فرقونا وسلبونا احلامنا الورديه
نمشي اخطانا ثقال وروسنا منكوسه

امنعوها لآتجي يمي ولآ العب معها
وكل واحد من قرابتها شهر لي موسه

وطعنتني من يدين اهل الغضي في غره
خنجرن في سم لذات الهوى مغموسه

قلت خلوها بصدري لآحدٍ ينزعها
عن عذولي داخل اعماق الحشى مدسوسه

اتركوها تقطع انفاسي اليا جيت انسى
اني التلميذ وهو اللي عطاه دروسه

فرقتنا ياسعد عاداتنا العرفيه
لآ تقول انه جفا وحضوضنا المنحوسه

الله انه يقطع الفرقا ومن يطريها
خلت الطفل الصغير يشيب من هاجوسه

والله انها دمعة العاشق على معشوقه
دمعة الطفل اليتيم اللي شديدأ بوسه

© 2024 - موقع الشعر