قال من عدى - حمد هادي المسردي

قال من عدى حجى نفنوف عالي
ضايق ن صدره وكاسرت ن شتونه

ابدع القيفان من ضيقات بالي
والغنا ماهي بتخفاني لحونه

فهاظني ياهل الوفا شي ن طرالي
وقلت قول وباعلمه للي يبونه

اشهد ان العز في كثر الحلالي
والعرب من قل ماله يكرهونه

من معه مال ن تراه يصير غالي
والفقير الناس لازم يرخصونه

يرخصه حتى الرفيق اللي موالي
واسرته لاقل ماله يبغضونه

مايبونه لا عمام ولا خوالي
_ يمكن ان عوال بوه يقاطعونه

والله لو هو مثل ابو زيد الهلالي
مايحسبونه ولايستعذرونه

والردي حيث ان بيده راس مالي
غالي ن عند العرب ويقدرونه

يمدحونه كل ماجاله مجالي
وان بدى له لازم ن يقضون شونه

لو ذليلن يخلعه زول الظلالي
مايكافح لو يتفل في عيونه

حدت الحاجه كريمين السبالي
يسمعون امر الردي وينفذونه

كم ردي ن ما يساوي له ريالي
صاروا طوال الشوارب يخدمونه

قالها اللي ذايق ن مرن وحالي
له روابع واخلفت بقعا ظنونه

© 2022 - موقع الشعر