تقبيل الأوراق

ماجا ابد في البال تقبيل الأوراق
يا بدر يهوى الشي من يعتني به

خطك وبصماتك وعطرك والأشواق
هن مصدر الود الذي مبتلي به

احيه من هم الموادع والأفراق
لأضفى على كبد المولع لهيبه

اسأل مجرب لاعه الود واشتاق
حن لهنا النفس الطموح العجيبه

تهوى الشقى اللي يشرح النفس لضاق
قلب الشقا هذا عناه ونصيبه

ما يشرح الخاطر اذا عزم وتاق
الا منادم من جذوره عريبه

اللي عليه الدمع من ناظري راق
ومثلي الى من راق دمعه مصيبه

لأنحى بلا خدعه ولا زيف وانفاق
والرجل ينفي كل شي يعيبه

ما فز خفاقي لحي ٍ ولا لاق
في البال مثل اللي اسرني بطيبه

ولأجل الغلا لا باس تقبيل الأوراق
لا باس ألملم ما بقى واعتني به