وصايا

اربط وحازم كل زله لبني خيك
لا تصير مشذوبً على كل من جاك   

كم من فقيرً دافعً للكرم شيك
   

 وكم من غنيً واهقً كل شباك
 مابيك توصيني ولا اني بموصيك

والمرجلة ياطيب الساس تنخااك
 وماتاخذه ياكود ماتفعل يّديك

وتفرح به اصحابك وتزعل به اعداك
‏درب المكارم يعتلي في معاليك

‏حرٍ على الطولات ساطي وسفاك
‏والطيب سلعه و المواقف هقاويك

واللي برك دون المواقف بيفداك 
 وكسب النعم مايقصر خطاويك

 يرفع مقامك مايحدرك ماطاك
ويصعد على رجم الوفا من وفا فيك

بالمرجله والطيب سوى سواياك 
خل الفخر ياطيب العرق شاريك

وان طبت في دنياك من طيب مرباك
ارفع مقامك عن دروب الصعاليك

وميّز مكانك بين هذا وهاذاك 
المرجله ماجابها لك تمنيك

احذر تحرّاها وتبكي بفرقاك
اسعى لها لو الحفا حاف رجليك

درهم وزرفل لاتباطا تباطاك
اجعل دروب المرجله من معانيك

 واحذر تميل عن درجها بمرقاك
درب الردا لاتجعله بين عينيك

يعميك عن درب الشجاعه ويبلاك 
 وصل الفروض ولا تضيع مباديك

وبوالدينك بر والله يرعاك 
المرجله صعبه ولاني بناهيك

والله ماترخصها ليسراك يمناك 
واللي لها كانوا عبيدن مماليك

 حَطوا لهم في قمّة العزه املاك