الرسايل

الرسايل والوسايل والهدايا والثريا
كلها كانت تنادي يانظر عيني يبونك

والله إنك يا بعدهم بين أضلاعي هنيّا
القصايد والمشاعر كِنّها نامت بدونك

كم تمنيت ألتقي بك وأفرح بذاك المحيّا
كنت صابر في غيابك أنتظر تمطر مزونك

لو عطوني شي واحد خير عن مليون شيّا
ما قبلت إلا بنظرة تروي عيني من عيونك

من عرفتك فز قلبي واختفى همه وعيّا
قال نامي في مكانك والله يا عمري لصونك

حتى شوقي في غيابك ما لقى للهجر فيّا
الأماكن والمساكن لو اطاوعهم يجونك

نبض قلبي يا غناتي دق في صدري كذيّا
كل زفره من عروقه ودّها تروي غصونك

لو طويتي من حياتك صفحة التاريخ طيّا
والله إنه ما طرالي أنسى تاريخي واخونك

كان باقي في حياتك للمشاعر نبض حيّا
اعزفي لاوتار قلبي لحن من باقي لحونك

المعاني والأماني تطلبك وتقول هيّا
خلي يديّني تلامس يا بعد كلي متونك