ليال البعد

الليله الليله سرتبي هواجيس
واسترسل الهاجس ولاهو بهادي

مشتاق واشواقي بصدري محابيس
معلن عليها من قديم الحدادي

اخفيتها بقصا الظلوع المقاويس
واظنها الليله تبى العلم غادي

تبي تسريني بعيد المراميس
مسرى القدم ولاحروفٍ جدادي

واحس نبض القلب كنه مراويس
ينبض بقلبي نبض ماهو بعادي

هذي ليال البعد بانت معابيس
دايم على العشاق مثل الاعادي

تشعلي شموع الغلا كالفوانيس
وتشعل جنون الشوق داخل فؤادي

اهد وابني طول ليلي على ايس
والعجز يصدح من غلاه الودادي

ماودي اشرح والعواذل دنافيس
ولاودي اكتم والظماير تنادي

ودي اقول اللي بقلبي ولاقيس
ولاهمني راع العلوم الدوادي

بقول احبك حب ماهو بتدليس
حب الشرف ياغايتي يامرادي

حبٍ حقيقي ماغشته الوساويس
حبٍ على طهر المشاعر ينادي

حبٍ عجز دونه وساويس وابليس
ولايدخل الخاطر شكوك العبادي

حبٍ خفي وماخفى داخل الكيس
تراه اعظم ياغزال البوادي