صباحك غير

صباحك غير عن باقي صباحات البشر والكون
صباحٍ مختلف ياروح روحي والملا دونك

تراك الاول بقلبي ولاغيرك احد بيكون
تطمن لاتفكر في غلاتك عند مضنونك

لو انك تعلم وتدري عن اللي في الحشا مكنون
نسيت الناس ياعمري وجيت اليوم مفتونك

انا اكتب لك صباحي والصباح المختلف مجنون
تمنى لو تحط يديك ويدينه على متونك

دوى قلبي مع جروحي وكل اللي مضى بيهون
لو انك بس تلمسني واشم العطر بردونك

الا ياويل من حاله مثل حالي بكم مفتون
قضى عمره مع سنينه تمنى شوفة عيونك

ضناه البعد وهمومه وقلبه عندكم مرهون
يسلي خاطره لامن تخيل ضحكة سنونك

نهارٍ قد جمعني فيك من بعده بديت اكون
بديت اول حياة العمر بيديني على متونك