# عدودٍ الروىَ ..

من منطلق خبره وعرف ودواليل
قال الخبير اللي تمثل وغنا

ما يحقق أحلامه قليل المحاصيل
يهوم راس الطايله ويتونا

مثل البعير اللي ثنى ساقه الشيل
يبي يقوم ومن رداه يتثنا

تبت يمين اللي شكى قلة الحيل
يوم الذيابه للذيابه عونا

أما نكون أسياد بين الرجاجيل
ولا بلاش نقول حنا وحنا

لا صار للحانا تساق الفناجيل
تقصيرنا ما يبعد اللوم عنا

عند الرجال ينزل القدر تنزيل
ويفتح علينا أبواب منا ومنا

وان صار للي ما يبينا مداخيل
بالواردة والصادرة يمتحنا

اللي علينا قلبه أسود من الليل
يفرح إلى جتله على ما يتمنا

مايدري إنّا نذلل الصعب تذليل
نروض الأصعاب ما روضنا

بعزومنا ناصل بعيد المناويل
للمستحيل عزومنا وردنا

ورد الظوامي للعدود الشهاليل
وردن على عدود الروى وارتونا

ما حوّلنا من الشداد المحابيل
وش عذرنا للناس لو حولنا

الله خلقنا أحرار ما نقبل الميل
في وقتنا الحاضر وماضي زمنا

ما نقبله وأسلافنا تتعب الخيل
وحنا لنا بيوت المعزة تبنّا

أهل السلوم الطيبة والتعاليل
كنا وما زلنا مثل يوم كنا

سلومنا ميراث جيلاً(ن)بعد جيل
إن ما رفعنا فوق ما نزلنا