الناس.. بين تلفاز وريموت ومكيف

الناس راحت للمصايف وحنّا
مابين تلفاز وريموت ومكيّف

والهم لو ينقاس خمسين طنّا
وفوق الهموم الجو حار ويعيّف

واغلى أصدقانا راحوا اليوم عنّا
والقلب مشكلته عليهم صخيّف

ليت الذي نشتاق له في وطنّا
والله! ما نسأل عن الليّ يصيّف

وليت الزمن يمشي على ماتمنّى
ان كان شقّقت الخريطة وأزيّف

وخليجنا يصبح بشرقي فيينّا
والضيف يصبح في مقام المضيّف

وتصبح زلمسي ملكنا ونتهنّى
حتّى الابل تشبع وفيها تكيّف

ونعتز بالاسلام مانستكنّا
ونقود كل الغرب قود الخريّف

ونصنع لنا تاريخ مجدي يبنّى.
ونحرر الاقصى بفعلي يسيّف

هذي طراة العمر لكن غبنّا!
الحال متدهور.. وحيلي ضعيّف

الله يعدّل مابقى من زمنّا
ويزين حظي طال وقته وصيّف

وان عوّدت للحق لو نتغنّى
ونظهر مشاعرنا بقافي لطيّف

ترى القناعة كنز فالقلب منّا
ولازم نساير وقتنا ونتكيّف

ونصبر على جو الخليج ووطنّا
نصبر على جوّه لو أنّه يعيّف