من ترجاك ماضاع

يالله يالي من ترجاك ماضاع
يا مقتدر ياللي حصونك منيعه

ياخالق سبع السموات والقاع
والكون ومكون جمال الطبيعه

ياحي يا للي للمقادير مناع
ماخاب مخلوق ورسولك شفيعه

مجري سفينة نوح في الموج بشراع
يامغرق خصمه ومنجي تبيعه

يا حافظ يعقوب من عقب مرتاع
يوسف ويا كافيه شر الخديعه

ويا مظهره من بير وبروج وسباع
ياللي حميته عقب ذيك القطيعه

انك توفقنا مع خير الاتباع
وانك إتبعنا طريق الشريعه

جانا الغرام وصار للشعر مطلاع
من مخزن راعيه ماهو يبيعه

سر يا قلم من بين مفروق الاصباع
اكتب بيوت محكمات سريعه

جزلات عجلات سريعات في ساع
مستخرجات من ضمير تطيعه

تلعب بها الافكار باشكال وانواع
وابيات تلحق والمباديء طليعه

والشعر يوزن غير ماهو بصاع
يوزن بمنطوق المعاني الرفيعه

والشعر فيه انصاف واثلاث وارباع
واللي يخوضه ماعرف له فجيعه

يدخل بسوق من شرى فيه ماباع
يصبر عليه يحتمل لوم ريعه

كالمشتغل بالزرع ماهو بزراع
بنفذ حلاله ويتخسر زريعه

لا جا الخضار وقطف الاثمار ينلاع
يابس وللماء في عروضه نفيعه

البارحه يوم المخاليق هجاع
فزيت فزت من غداله وديعه

والجفن عيا يقبل النوم من صاع
حارب لذيذ النوم مما يليعه

قلبي لزينات التماثيل مطواع
واليوم يعتاز الخوي الربيعه

ياراكب اللي تطوي الخد بالباع
منقيت من جيش طليعه

قربتها في لازم عقب مرباع
عقب الطمان اللي رياضه شبيعه

تزهى الشداد والزين وابطان واصقاع
وخرج من المشرق جديد وشيعه

وان كان قصدك تختبر وانت طماع
واسباب ما بك تتخذها ذريعه

قس بالبحر بالباع والمتر وذراع
واحذر غبيب مالها حد قيعه

قايس هواك وحط ماطور دفاع
والموج لا تلقا هوايل رفيعه

قاع البحر لا جات الاقدار بلاع
وخطر يموت اللي ينوشه صقيعه

واعرف ترا حبل المقادير خداع
وحبل الرد ملزم ابليس وخديعه

واللي حياته للمخاليق مطواع
لا بد يلقى واحد مايطيعه

ومن جاع شبع وكل من شبع قد جاع
والهون سلم النفوس الوضيعه

والناس فيهم روس وضروس وكراع
وفيهم فواعيس حكاهم طبيعه

وفيهم اسود الغاب واسباع وضباع
شيان الفعايل والطبايع شنيعه

قلته وملزوم على الخط مرجاع
وملجاك يامنجي الزبين ومنيعه