تحمل خطاياك - جاسم الماس

الأرض جفّت والشجر يرتجي ماك
شلي جرالك ليش وصلك قطعته

ياما رويت ارضي من اسيول مجراك
لين الشجر أثمر ووردي قطفته

شلت الهنى مني على كف يمناك
بطّرت حالك لين دربي هجرته

صبرّت نفسّي لنّ لي قلب يهواك
احساس حبي فالحشا لك أسرته

حكمت فكري شل شعري وناداك
وانته ولا داريت شعر(ن) سمعته

لين الأمل عافك وينعاف شرواك
من باعني برخيص برخيص بعته

وانا دعيت الله وعاكست ممشاك
والله رزقني خير وآنا شكرته

مر الزمان وجيت تحسبني ابغاك
ياكيف تحيي حب شخص(ن) قتلته

اربع سنين(ن) ذقتها ابمر فرقاك
واليوم ترجع وين أمسك تركته

واعزتي للقلب من يوم شفناك
انا اشهد انه في شقا من سكنته

رح للذي عني مع الوقت ألهاك
ولاّ جفاك وانت بالحب صنته

شوف الغدر في دنيتك وين ودّاك
وطا براسك بعدما رفعته

خل الندم يهواك ويدوم وياك
مادام بابه انته الي طرقته

دام الخطى فنّاك تحمل خطاياك
كمل طريقك روح دامك تبعته

مابا اترجاني ولاتقول أفداك
انسى الوفي الي بزيفك تبعته

ماعدت بك راضي وماعدت أنا ذاك
لي لو طلبته نفذ الي طلبته

اذرف دموعك زيد يالله محلاك
هذا الحصاد اللي بيدّك زرعته

انا محيتك من حياتي وذكراك
ولعة فيها لين طيفك حرقته

لاتحسب ان الحب موجود يرعاك
حبك نزعته من خفوقي وعدمته

© 2024 - موقع الشعر