لا تتصل

لا تتصل وتقول مبروك بالعيد
تعال عايد دام تسمح ضروفك

العيد ماهو تتصل وانته بعيد
العيد والله يبتدي من اشوفك

ساعة تجي ومصافح الايد بالايد
وكفي على طول اللقا في كفوفك

من لهفتي وياك ياسيد الغيد
مو ناقص الا تضمني في كتوفك

مايجتمع في الحب خوف ومناقيد
ان عاش معك الحب بيموت خوفك

وانا ادري ان الحب في قلبك ايزيد
باين من عيونك وكثرة كسوفك

ومدامنا في العيد وصرنا مو اعيد
ابتفنن يالغضي في وصوفك

زودٍ على حلياك يافارع الجيد
توقف جميع الناس حزة وقوفك

تدري متى بتجيب في تركي العيد
لا قلتلي عيدك مبارك واشوفك